БЕЛАРУС № 569 за чэрвень 2010 г.

  

 

   У ліпені спаўняецца 95 гадоў слаўнаму дзеячу беларускай грамады ў Амэрыцы, сябру нацыянальнага вызвольнага руху ў Заходняй Беларусі, сябру Беларускай Незалежніцкай Партыі, аднаму з заснавальнікаў БАЗА і шэрагу іншых беларускіх арганізацыяў у ЗША, шматгадоваму старшыню Галоўнай управы БАЗА сп. Антону ШУКЕЛОЙЦЮ.

   Жадаем юбіляру здароўя, аптымізму і доўгіх гадоў жыцьця – каб ён дачакаўся ўбачыць сапраўды вольную і незалежную, сапраўды беларускую Бацькаўшчыну.

Выказваем удзячнасьць за адданасьць беларускай справе, за шчырую дапамогу моладзі ў справе пачатку новага жыцьця ў Амэрыцы, у падтрымцы беларускага духу, беларускай мовы і культуры далёка ад Бацькаўшчыны.

   Спадзяемся, сп. Шукелойць, што Вы яшчэ доўга і плённа будзеце весьці далей сваю грамадзкую і асьветніцкую дзейнасьць на радасьць нам усім і на карысьць Беларусі.

Управа Нью-Ёрскага аддзелу БАЗА

 

   Рэдакцыя “Беларуса” далучаецца да віншаваньня і пажаданьняў нашаму шаноўнаму вэтэрану.

   Ніжэй зьмяшчаем раней недрукаваны верш Натальлі Арсеньневай, які яна некалі даслала сп. Шукелойцю на імяніны, якія ён мае ў чэрвені.

Малітва да цудатворнага абразу Жыровіцкай Божай Маці

О, Маці, што закрасавала

Свайму народу не ў цьвярдыні,

Акрытай славаю нязьвялай,

А на ігрушцы ў пушчы сіняй.

 

Ты, што ўспыхнула зарніцай

Не ўладаром зямных узвышшаў,

А пастушком малым і ніцым,

Будзь нашай Радасьцяй Нясьцішнай.

 

Будзь апякункай усяможнай

І тым, што гінуць за радзіму,

І тым, што торбы падарожнай

Важкое з плеч ніяк ня здымуць.

 

Дай, каб нам гарт ва ўсім дастоіў,

Дай, каб мы верылі, як дзеці,

Дай, каб Імя Тваё Сьвятое

Пранесьлі зь вераю па сьвеце.

 

Дай, каб злаба, мана, зацятасьць

Нам не былі ў жыцьці спакусай...

Вярні нам нівы нашы й хаты,

О, Маці божай Беларусі!