Bielarus5ViestkiBAZA

БЕЛАРУС № 570 за ліпень 2010 г.
Весткі й Паведамленьні № 7 (534)
нью-ёркаўскага аддзелу Беларуска-Амэрыканскага Задзіночаньня
Viestki j Paviedamlenni
Belarusan American Association, Inc.
Сусьветнае сеціва: www.baza-belarus.org

Чэрвеньскі сход нью-ёрскага аддзелу БАЗА

   У суботу, 12 чэрвеня, адбыўся чарговы чэрвеньскі сход Нью-Ёрскага аддзелу БАЗА. Сход ужо другі раз быў праведзены ў Міжнародным Доме Маракоў на Мангэтане. Дзеля перашкодаў збоку парафіяльнае рады сабору сьв. Кірылы Тураўскага ў Брукліне не ўдалося гэтым разам дамовіцца аб выкарыстаньні для сходу грамадзкай залі сабору.
   Напачатку сходу старшыня аддзелу Віталь Зайка выступіў з традыцыйным аглядам падзеяў у Беларусі і падзеяў у Амэрыцы, што датычаць Беларусі, за апошні месяц. Сярод апошніх былі ўзгаданыя візыт у ЗША кіраўніка Руху “За Свабоду” А. Мілінкевіча і сустрэча зь ім у Брукліне; прыезд апазыцыйных палітыкаў А. Лябедзькі, У. Някляева і Я. Раманчука, і працяг урадам ЗША яшчэ на 1 год санкцыяў супраць Лукашэнкі і паасобных функцыянэраў рэжыму. Далей прамоўца коратка закрануў такія тэмы, як чарговыя спрэчкі паміж кіраўніцтвам Беларусі й Расеі вакол мытнага кодэксу і мытнага зьвязу, расейскага мыта на экспартаваную ў Беларусь нафту. Сп. Зайка спыніўся таксама на высоўваньні кандыдатураў на прэзыдэнцкія выбары ў Беларусі, што заплянаваныя на наступны год, і што ёсьць ўжо 12 кандыдатаў. У канцы быў узгаданы параўнальны сацыялягічны аналіз навукоўца С. Ушакіна з Прынстану беларускага і кыргыскага грамадзтва, як прыклад дзьвух невялікіх пост-савецкіх краінаў што знаходзяцца пад уплывам расейскай палітыкі, і ва ўмовах дамінацыі расейскай пост-савецкай культуры.
   Затым перад прысутнымі выступілі чацьвёра музыкаў зь Беларусі, што падарожнічаюць па сьвеце з сваім культурніцкім праектам і цяпер затрымаліся ў Нью-Ёрку. Сьпявак і гітарыст Верасень прадставіў сваіх сяброў Аўгіньню Манцэвіч, Кірыла Краўцова і Віку Малаеву. Сп. Верасень акрэсьліў праект, падарожжа з зэдлікам тыпу “табурэт”, як прэзэнтацыю беларускай прасторы рэальнай свабоды. У Беларусі людзі, седзячы па сваіх кухнях на падобных зэдліках, часьцяком клянуць Лукашэнку і ягоны рэжым, але вонкі сваіх кухань застаюцца збольшага паслухмяным электаратам. І таму кухонны зэдлік, зьяўляецца сваеасаблівым сымболем спэцыфічна беларускае свабоды, так як статуя Свабоды ў нью-ёрскай затоцы ёсьць сымболем свабоды амэрыканскае. Удзельнікі праекту вывозяць гэты сымболь у шырокі сьвет, далей ад супоў і макаронаў і на шырокі прастор, на акіян. Мэта падарожнікаў – мыс Горн, на самым краі паўднёваамэрыканскага кантынэнту, дзе “табурэт” будзе ўрачыста ўсталяваны на беразе акіяну.
   Музыкі выканалі, пад акампанэмэнт скрыпкі й гітары, шэраг беларускіх песень, у тым ліку народныя “За туманам”, “Там каля млыну цьвіла каліна”; таксама “Простыя словы” Л. Вольскага, і “гімн беларускай табурэтнай каманды” – песьню “Зорачкі” (“Ляпіс Трубяцкой”).
   Затым былі адказы на пытаньні прысутных. Госьці распавялі пра свае бліжэйшыя пляны і маршруты – удзел у фэстывалі ў Альбукерку і затым вандроўка праз Мэксыку далей на поўдзень.
   Паэт і бард Сяржук Сокалаў-Воюш падзяліўся з прысутнымі сваімі думкамі пра шэраг праблемаў, якія напаткалі беларускі нацыянальны рух у Беларусі (падзелы і фракцыі ў БНФ) і беларускую грамаду ў Амэрыцы (падзелы і фракцыі ў БАЗА), і адзначыў, што назіраюцца пэўныя паралелі ў абодвух выпадках. Сп. С. Сокалаў-Воюш выклаў сваё бачаньне канфлікту ў БАЗА і адзначыў ягоную штучную прыроду, як вынік дзейнасьці абмежаванага кола асобаў, што спрабуюць навязваць уласнае разуменьне прынцыпаў працы БАЗА на шкоду рэшце сяброў арганізацыі.
   З прывітаньнем да гасьцёў-музыкаў і да прысутнай моладзі выступіў былы Старшыня Галоўнае управы Антон Шукелойць, які таксама дадаў свае думкі адносна бягучага моманту ў арганізацыі БАЗА.
   Сакратар аддзелу БАЗА Валянціна Якімовіч распавяла пра сутнасьць старажытнага абраду Купальля, і заклікала прысутных прыняць удзел у сьвяткаваньні Купальля Нью-Ёрку сёлета, якое ладзіцца спадарствам Пятра і Алены Рыжых.
Віталь ЗАЙКА

“Бруклінскі аддзел БАЗА” – крок да яднаньня?

   Напачатку чэрвеня сёлета ў грамадзкай залі сабору сьв. Кірылы Тураўскага ў Брукліне адбыўся сход новай структуры Беларуска-Амэрыканскага Задзіночаньня, якая была названая “Бруклінскі аддзел БАЗА”. Перад тым ініцыятыўная група з 21 чалавека падала заяву ў Галоўную ўправу БАЗА, а Галоўная ўправа падтрымала ініцыятыву і дала дазвол на стварэньне аддзелу.
   Гэтая, быццам бы вартая ўхваленьня, падзея выклікае шэраг пытаньняў. Перш за ўсё, новы “аддзел” быў створаны ў Нью-Ёрку, дзе, вядома, ужо амаль паўстагодзьдзя існуе структура БАЗА – Нью-Ёрскі аддзел Беларуска-Амэрыканскага Задзіночаньня. Новы “аддзел” адным з галоўных кірункаў дзейнасьці называе “справы арганізацыйнага яднаньня беларусаў Нью-Ёрку”. Таму вельмі дзіўна бачыць, што гэтага “арганізацыйнага яднаньня” імкнуцца дасягнуць, ствараючы новую структуру на абшары дзейнасьці ўжо існуючага аддзелу БАЗА, без кансультацыяў зь ягоным кіраўніцтвам.
   Па Статуце БАЗА, новы аддзел можа быць закладзены на заяву сяброў, што жывуць у нейкай адной мясцовасьці. Аднак з шасьці сяброў управы новага “аддзелу” толькі адзін, наколькі вядома аўтару гэтых радкоў, жыве ў Брукліне.
   Новы “аддзел” атрымаў арганізацыйную грамату ад сёнешняй Галоўнай управы БАЗА. Аднак гэтая Галоўная ўправа начале з старшынём В. Станкевічам не прызнаецца ў дадзены момант правамоцнаю двума найбольшымі аддзеламі арганізацыі, у Нью-Ёрку і Нью-Джэрзі, дзеля хібаў і парушэньняў, якія адбыліся падчас выбараў на апошнім Кангрэсе БАЗА. У сваіх заявах аддзел БАЗА ў Нью-Ёрку і аддзел БАЗА ў Нью-Джэрзі адзначылі патрэбу правядзеньня надзвычайнага Кангрэсу дзеля выпраўленьня хібаў і парушэньняў. Было заяўлена, што да правядзеньня надзвычайнага Кангрэсу Галоўная ўправа і яе старшыня не зьяўляюцца правамоцнымі. Аднак сп. В. Станкевіч і сфармаваная ім Галоўная ўправа пакідаюць гэтыя заявы без увагі.
   Працягам гэтага ігнараваньня трэба лічыць і спробу ўтварэньня структуры, альтэрнатыўнай наймацнейшаму і найэфэктыўнейшаму аддзелу БАЗА, што дала-б нейкае апірышча (або бачнасьць яго) для падаўжэньня дзейнасьці сёнешняй Галоўнай управы. Хацелася-б адзначыць, што існуючае становішча ў БАЗА і праблемы адзінства арганізацыі могуць быць вырашаныя толькі праз скліканьне надзвычайнага Кангрэсу БАЗА і вынясеньня набалеўшых пытаньняў на шырокае абмеркаваньне, а не праз аднабаковыя крокі, такія як стварэньне ў БАЗА альтэрнатыўных структураў кшталту новага “Бруклінскага аддзелу”, што толькі замацоўвае разьяднаньне. Хацелася-б таксама верыць, што яднаньне ўсё-ж будзе дасягнутае.
Віталь ЗАЙКА
----------------------------

ЛІПЕНЬСКІ СХОД Нью-Ёрскага аддзелу БАЗА адбудзецца ў НЯДЗЕЛЮ, 18 ліпеня 2010 г. у Цэнтральным парку на Мангэтане.
Пачатак сходу а 2-й гадзіне папаўдні.
Месца правядзеньня: у Цэнтральным парку насупраць 79-й вуліцы на ўсходнім баку Чарапашай сажалкі ля помніка Каралю Польскаму і Вялікаму князю Літоўскаму Ягайлу. (Насупраць Бэльвэдэрскага замку.)
   Збор каля помніка каралю і вялікаму князю старабеларускай дзяржавы Ўладзіславу Ягайлу, што стаў каралём і ўзначаліў войскі польска-літоўскай дзяржавы ў бітве пад Грунвальдам. Якраз у гэтыя дні, 15 ліпеня, спаўняецца 600 гадоў перамогі пад Грунвальдам, дзе большасьць войска Вялікага Княства Літоўскага складалі беларускія ваяры.

Газэта "БЕЛАРУС"

Апошні нумар Замовы й паслугі