БЕЛАРУС № 558 за ліпень 2009 году

 

 

 

Шахматы для ўсіх

 

   З 7 па 17 траўня ў Сэнт-Люісе, штат Мізуры, прайшоў чэмпіянат ЗША па шахматах. У спаборніцтве ўзялі ўдзел 24 мацнейшых шахматысты, 12 зь якіх – выхадцы з былога СССР. Наш зямляк, міжнародны гросмайстар Юры Шульман абараняў свой тытул чэмпіёна Злучаных Штатаў, які ён заваяваў летась ў Аклагоме. Да шостага туру Юры заставаўся сярод лідэраў, але напрыканцы прайграў некалькі матчаў і апынуўся толькі на шостым месцы. Тытул чэмпіёна адыйшоў да маладога гросмайстра Гікару Накамуры зь Нью-Ёрку. Тым ня менш, Юры кваліфікаваўся ў Кубак сьвету, дзе яму давядзецца змагацца з мацнейшымі шахматыстамі плянэты.

   Юры Шульман нарадзіўся ў Менску ў 1975 годзе, а ўжо ў 1995 годзе заваяваў тытул міжнароднага гросмайстра і чэмпіёна Эўропы. Чатыры гады пасля таго, Юры пераехаў у ЗША і адразу зарэкамендаваў сябе як аднаго з мацнейшых гульцоў. Леташні год быў самым пасьпяховым для Юры, калі ён перамог на чэмпіянаце ЗША, а таксама заняў трэйцяе месца на Сусьветнай шахматнай алімпіядзе ў Дрэздэне. Але на гэтым наш зямляк не спыняецца, а імкнецца заваяваць самы высокі шахматны тытул  – чампіёна сьвету, чаго я яму ад шчырай душы жадаю!

 

   Рашэнне задачкі, пададзенай ў мінулым нумары:

   1.Фf6 Kc7

   2.Фe7 мат, ці

   1.Фf6 Ke8

   2.Cc6 мат.

   Нягледзячы на тое, што правільных адказаў у нас не было, і фактычна пераможцы няма, вельмі хачу падзякаваць усіх за ўдзел у конкурсе, і асабіста Кацярыне Мазурэнка, якая першай даслала свой адказ. Ёй мы і прызначаем першы прыз літаратурны альманах “Беларус”. Нашы віншаваньні, Кацярына!

 

   А для усіх аматараў шахмат, хто хочуць паспрабаваць свае сілы, прапаную наступную задачку: ход белых, мат у два хады. Дасылайце свае адказы на мой электронны адрас у інтэрнэце: palina_churun@yahoo.com. Аўтар першага правільнага адказу атрымае прыз ад рэдакцыі газэты (CD гурта “NRM”).

Жадаю посьпехаў.

Паліна ЧУРУН