Пётра МУРЗЁНАК
Змагарам
Ахвярую Алесю Качану (Кастусю Акулу)
Зыходзіць гвардыя змагарная
Па аднаму ў лепшы сьвет.
Былі ўчора легендарныя,
А заўтра станеце навек.
Паўсталі ваярамі вечнымі
За вольны і свабодны край.
Зрабілі столькі чалавечнага –
Нябесны Вам за гэта рай.
Пакуты вынесьлі бязьмерныя,
Але куды-б ня неслі хвалі –
У турмы, у краі замежныя –
Вачэй ніколі не хавалі.
І твары ясныя, адкрытыя,
Упэўненасьць у кожным кроку:
"Гэй, беларусы, бярыце прыклад!
Бліжэй да нас, ня стойце збоку!"
Доўга йшлі змагарнымі шляхамі,
Бо верылі, што прыйдзе час –
І бел-чырвона-белымі сьцягамі
Радзіма прывітае Вас.
Лявон БАРАВЫ
Плывуць гады ў вечнасьць,
Назад ня вернуцца яны,
(такі лёс ёсьць чалавечы)
зьнікнуць нібы сны.
Вітаю сам сябе
З васьмідзесятым годам,
(як хутка час прабег)
Я зь Беларусі родам.
Пакінуў родны кут
У пятнаццаць год маіх,
Пражываю век я тут,
У чужым для нас краі.
Малюся кожны дзень
За здароўе Богу,
За лепшы быт людзей
І жыцьця дарогу.
Прашу я прабачэньня
За ўсе мае грахі,
Лаўлю вецер жменяй,
Хачу, каб ён заціх.
Люты 2008 году
Анатоль СТАРКОЎ
Крок Айчыны
За свабоду стань пад сьветлыя сьцягі
Побач са мною.
Справядлівасьць крок за крокам адстаім
І пераможам!
Будзе шчасьлівы вольны шлях,
Бо дапаможа
Наш бел-чырвона-белы сьцяг,
Наш герб Пагоня.
За дзяржаву стань пад сьветлыя сьцягі
Побач са мною.
Незалежнасьць крок за крокам адстаім
І пераможам!
Будзе шчасьлівы вольны шлях,
Бо дапаможа
Наш бел-чырвона-белы сьцяг,
Наш герб Пагоня.
Беларусы! На сваёй сьвятой зямлі,
Разам са мною,
Веліч мовы крок за крокам адстаім
І пераможам.
Будзе шчасьлівы вольны шлях –
Бог дапаможа!
Наш – бел-чырвона-белы сьцяг,
Наш герб – Пагоня.